Motor Vehicles Act thar hman ṭan niah mi 3,900 sum chawi tir

Pathianni aṭang khan Motor Vehicles Act siamṭhat chu hman ṭan a ni. Delhi-ah chuan he Act hman ṭan ni hian dan bawhchhia, mi 3,900 chuang manin sum chawitir an ni. 

Delhi Traffic police-ten dan bawhchhia an man zingah hian helmet tel loa two-wheeler khalh leh emergency motor tlanna tur lo dalte an tel a ni. Hei bakah hian kum tling lo motor khalh man chu amah enkawltuin sum a chawi a ngai tawh dawn bawk a ni. 

Pathianni zan dar 7 thlenga dan bawhchhia, challan pekchhuah hi 3,900 an tling. Kum 2018 chhunga Delhi traffic police-ten dan bawhchhia an chawitir zat hi 6,704,560 a ni a, hei hi nikhatah mi 20,000 zel chawitir ang a ni phak. 

July thlaa Parliament-in a pass,  Motor Vehicles (Amendment) Bill, 2019 hi Pathianni aṭang khan hman ṭan a ni. He dan siamṭhatah hian dan bawhchhiate hremna na zawk siam a ni a, sum chawi turte pawh tihsan an ni. Seat belt hreng loa motor khalhte chu Rs 1,000 thleng chawitir theih a ni a, motor khalh laia mobile phone hmang pawh Rs 1,000 - 1,500 thleng chawitir theih an ni bawk. Ambulance leh fire motor-te kawng kian duh lo chu Rs 10,000 thleng chawitir theih an ni dawn bawk.