Chandrayaan-2 Lander Vikram leh rover Pragyaan-te orbiter aṭangin chhuak

Chandrayaan-2-in a phurh lander Vikram leh rover Pragyaan-te chuan nimin chhunah khan an orbiter chhuahsanin Thla lam an pan. 

Vikram leh Pragyaan-te hian nimin chhun dar 1:15-ah khan orbiter hi an chhuahsan tih Indian Space Research Organisation (ISRO) chuan an tarlang. 

An ruahman anga thil a kal a nih chuan Vikram hian September 7 hian 'powered descent' miniute 15 chhung a ṭan ang a, hemi ni hian India chu khawvel ram tam tak zingah Thlaa rover nghat thei palina leh Thla chhim tawpa mission kalpui thei awmchhun a ni tawh ang.

Praygyaan hi Chandrayaan-2-in rover ke paruk nei a phurh a ni a, Vikram lander chhungah hian dah a ni. Nimin khan Chandhrayaan-2 orbiter hlawhtling takin an chhuahsan thei a ni.

Ni rei lote chhung chu Vikram lander hian  'manoeuvres' pahnih a 'perform' dawn a, hemi hmang hian Thla hi a hnaih zual deuh deuh dawn a ni. Naktuk zingah hi chuan Thla leilung a hel hnai hle tawh dawn a, a hel hnaihna lai berah km 36-a hnai a ni tawh ang a, a hlatna lai berah erawh km 110 a la ni thung ang.

Thla chhim tawp lam hian kum tluklehdingawn chuang zet ni eng a hmu tawh lo nia hriat a ni a, kan Solar System-a hmun vawt lai ber zingah a tel a ni. ISRO chuan helai hmunah hian tui tam tak a awm niin an hria a, Solar System insiam aṭang khan khawihbuai lohin a la awm niin an sawi.

Chandrayaan-1, kum 2008-a kahchhuah a nih khan Thlaah tui a awm tih a rawn tichiang a, hemi zirchiang tur hian Chandrayaan-2 hi tirhchhuah leh a ni.

Chandrayaan-2 hian Thlaa tui awm chungchang a zir chiang dawn a ni. Mahse Thlaa tui awm chungchang a zirchiang dawn a ni mai lo a, experiment hrang hrang a nei dawn bawk. Hemi hmang hian Solar System pianchhuah dan leh nunna lo awm dante eng emaw chen hriat theih beisei a ni.

Rover Pragyaan hian Thla leilung hi khawvel hunbi chhiar dana ni 14 chhung a fangkual dawn a, surface leh sub-surface experiment-te a ti nghal ang.