IAF-in Apache helicopter 8 nei thar

Punjab-a Pathankot airbase-ah Apache helicopter thar pariat chu Indian Air Force kutah hlan a ni.

Nimina IAF-in Apache helicopter thar an neih hi US siam Apache Guardian Attack Helicopters AH-64E a ni a, helicopter thar inhlanna hunah hian IAF Chief Marshal B S Dhanoa chu khuallian niin, Apache attack helicopter-te chu IAF-in an hman mek Mi-35 fleet thlakna tur a nih thu a sawi.

Apache chu hmanraw tunlai ber ber hmanga thuam a nih thu sawi bawkin, a thlawh chak bakah a 'survivability' a ṭha hle a, eng hunah pawh, eng ang boruakah pawh a hman theih a ni, a ti.

IAF Apache helicopter tharte hian July 27 khan Hindon Airbase, Ghaziabad an thleng tawh a, enchhinna hrang hrang neih a nih hnuah Pathankot airbase-ah hian dah a ni ta a ni.