Swachh Bharat vangin Modi chawimawina hlan dawn
Prime minister Narendra Modi chu Swachh Bharat mission-a a hma lakna avangin Bill and Melinda Gates Foundation-te chuan Goalkeepers 'Global Goal Award' an hlan dawn.
Kumin September 24 hian annual Goalkeepers 'Global Goals Awards' vawi lina hi New York-ah neih tum a ni a, kumin bika he Goalkeepers award theme chu, khawvela intluktlan lohna nuaibo a nih theih nana hmalak a ni. Annual award hi category panga - Progress, Changemaker, Campaign, Goalkeepers Voice leh Global Goalkeeper hnuaiah mimal emaw, pawl emaw hnenah pek an ni ṭhin.
Nikuma award semnaah khan Barack Obama, Emmanuel Macron Deputy UN Secretary-General Amina J. Mohammed Malala Yousafzai, Nadia Murad leh Trevor Noah-te chuan thu an sawi a, anni bakah hian Ed Sheeran, Lily Allen leh Fatoumata Diawara-te chu an zai bawk. Kumin atana programme tur hi peih fel a la ni lo.
Swachh Bharat mission hi kum 2014 October 2 aṭang khan kalpui ṭan niin, he hmalakna hmang hian pawn lama inthiar ṭhinte leh ekin nei lote tan ekin mtd 90 chu kumin October 2 hmaa siam zawh tum a ni. Tunah hian India rama thingtlang khuaah sanitation hna hi kalpui mek niin, kum 4 liam ta khan 38% chauh a tuam hman a, tunah chuan 98% a tuam thei tawh a ni.
He mission thil tum hi kumina India hnampa Mahatma Gandhi piancham vawi 150-na lawmnaa zawh hman tum a ni. Swachh Bharat-in a tum ber chu faina kawnga India mipuite inzirtir leh hriselna ṭha neih a ni.