Ram temple trust member-te'n PM an hmu

Ayodhya-a Ram temple sakna tura trust din member-te chuan Ningani khan New Delhi-ah prime minister Narendra Modi an hmu. Narendra Modi hmutu zingah hian trust president Nritya Gopal Das leh general secretary Champat Rai-te pawh an tel.

Nilaini khan Shri Ram Janmabhoomi Teertha Kshetra office bearer pawimawh zualte chu a vawi khatna atan an inhmu khawm a, principal secretary to the Prime Minister hlui, Nripendra Misra chu temple construction committee chairman-ah an ruat nghal. Ayodhya Mani Ram Das Ki Chavani head Nritya Gopal Das leh Ram Janmabhoomi Nyas chief, Vishwa Hindu Parishad vice president ni bawk Champat Rai-te hi lungrual takin Nilaini zana meetingah hian chariman leh general secretary tur hian thlan an ni a, Ningani khan PM hi an hmu nghal a ni. 

Rai chuan Prime Minister hmu tur hian sawm an ni tih sawiin, temple sak ṭan hun tur tak erawh a la sawi chiang lo. Trust member-te leh construction committee chairman hian kar leh hian Ayodhya hi an tlawh phawt dawn a, hemi hnu hian an hmalak zel dan tur chu an tichiang dawn chauh niin a lang.

Meeting an neih hmasak berah hian ni 15 chhunga meeting neih leh an rel a, hetah hian sak ṭan hun tur ruatfel erawh an tum.

Ningania Prime Minister an hmuha an inbiakna chungchang erawh hi chu mumal taka tarlan a ni lo a, Ayodhya tlawh tur hian Prime Minister an sawm tih erawh tarlan a ni thung.