Eptuten Parliament-a Presidential address boycott tum

Congress kaihhruai eptu party 16-te chuan  Parliament budget session ṭan ni, vawiina joint session-a President Ram Nath Kovind-a thusawi tur chu boycott an tum. Hei hi eptuten Presidential address an boycott ṭum hnihna tur a ni. 

Parliament joint session-ah President hian thu a sawi ziah a, sorkar agenda te sawilangin, a hnathawh ṭhat hrang hrang leh hmathlir a neihte a sawilang ṭhin. 

Kumin budget session hi thawh hniha neih a ni dawn a, a thawh khatna hi vawiinah ṭanin President chuan thu a sawi dawn a, February 15 thleng neih a ni ang. Session thawh hnihna hi March 8 - April 8 chhungin neih a ni dawn a, union budget chu February 1-ah pharh a ni ang. Session-ah hian eptu lam chuan farm law chungchangah sorkar chu an beih nasat hle rin a ni. 

Nikuma Parliament budget session-ah khan eptute hian Presidential address an lo boycott tawh a, joint session-a President-in thu a sawi laiin pawn lama Ambedkar lim hmaah programme hran siamin, citizenship law dodaltute an thlawpna lantirin constitution leh preamble-te an lo chhiar chhuak thung. 

Eptute chuan farm law duh lohna lantira nawrh huaihawt mek, loneitute an thlawpna lantir nan Presidential address hi an boycott dawn tih an sawi. Thuchhuah inṭawm an siamah, prime minister Narendra Modi kaihhruai sorkar chuan loneitute lungawi lote thil phut chu a ngaihven tawk lo a, chhanna a pek danah pawh a democracy kalphung lo hle a ni, an ti. Farm law sut tura an phut chungchangah loneitute an thlawp zel dawn tih an tarlang a, heng dan siam tharte hi state-te rights palzut sakna niin, ram danpui kalphung a palzut tih an sawi. Farm bill siam dawn hian sorkar lapui chuan state leh loneitu pawlte a berawn lo a, lungrual taka siam a ni lo a ni, an ti. 

Congress party chuan Republic Day nia Delhi-a loneitute leh police-te inkara buaina chhuak chungchangah union home minister Amit Shah chu mawhphurtuah an puh bawk a, minister a nihna aṭanga ban turin sorkar an phut.