Ni sarih chhung district 147-ah hri kai thar awm lo
Union health and family welfare miniter Dr Harsh Vardhan chuan ni sarih chhung chu ram chhunga district 147-ah Covid-19 hri kai hmuh thar an awm lo tih a sawi.
Nimina Covid-19 chungchanga high-level Group of Ministers (GoM) meeting vawi 23-na neihah minister chuan hei hi sawiin, "India ramah ni sarih liam ta chhung khan district 147-ah hri kai thar an awm lo a, ni 14 chhung chu district 18, ni 21 chhung district parukah hri kai thar hi an awm lo a ni," a ti.
Covid-19 hri leng dona kawnga sorkar hmalak dan chu a lungawi thlak hle tih health minister chuan a sawi a, "Hripui vanga thi awm zat, fatality rate hi a hniam ber kan la ni zawk a, 1.44% vel niin, hri kai tawh zinga 1,03,73,606 an awm tawh a, recovery rate hi 97% dawn a tling tawh a ni," tiin a sawi.
India ramah coronavirus kai enkawlna tur bik hospital leh healthcare facility 15,473 a awm bakah, Covid-19 care centre khum 19,00,714 awmna leh quarantine centre 12,673 a awm thu minister chuan a tarlang bawk. January 16 aṭanga Covid vaccine pek chhuah chu ram pumah session 42,674 neih a ni tawh a, mi 23,55,979 hnenah vaccine hi pek ni tawh a, Nilaini bik khan health worker 3,26,499 ten vaccine hi an dawng tih a sawi.
Ram chhunga hri kai enkawl mek zinga 70% chu Maharashtra leh Kerala state ami an ni a, Karnataka leh Tamil Nadu-ah hri kai mek hi 500 chuang la awmin, hmun dangah chuan hri kai mek hi 500 aiin an tlem vek tawh niin minister chuan a tarlang.
State hrang hrang zingah hri kai enkawl dam, recovery rate ṭhatna ber chu Dadra and Nagar Haveli leh Daman and Diu niin, 99.79% an tling. Arunachal Pradesh (99.585), Odisha (99.07%) leh Kerala (91.61%) ten an dawt a ni.
UK-a Covid-19 hri chi dang hmuhchhuah ang kai chu India-ah 153 an awm mek thu leh, heng mite hi khung hran leh an dinhmun pawh uluk taka enzui mek a nih thu minister chuan a sawi.