Loneituten Parliament pana kawngzawh tum ṭhulh
Loneitute nawrh huaihawt mekten farm law thar pathum duh lohna leh, heng dante sut tura sorkar laipui phutna lantirna atana Parliament session-a union budget 2021-2022 pharh ni, February 1-a Parliament building pana kawngzawh an tum chu an ṭhulh.
Kawngzawh tur hi ṭhulh mah se, loneitu pawl hruaitute chuan farm law duh lohna hi an lantir chhunzawm zel dawn tih an sawi. Mahatma Gandhi thih cham, January 30 hian ram pumah farm law dodalna lantirin public meeting buatsaih leh chaw ngheite an tum a ni.
Thawhlehnia loneituten tractor rally an neihna hmun ṭhenkhata Delhi police-te nen an innawrbuai leh loneitu ṭhenkhatin Red Fort-a Sikh sakhaw puanzar an zar chungchang chu police-ten an chhui mek. Buaina chhuak avang hian Delhi Police-te chaun thubuai 25 ziak lutin, an thubuai ziahluhah hian loneitu pawl hruaitu eng emaw zat leh, loneitu lamin buaina chhuahnaa mawhphurtua an puh, actor-activist Deep Sidhu hming pawh ziah lan an ni. Police-te chuan heng mite hi ram pawn lama an tlanchhiat lohna turin an passport pawh man sak an ni dawn tih an sawi. Sidhu hi thu zawhfiah tura koh a ni dawn tih police-te chuan an sawi bawk.
Loneitu leh police-te intihbuainaa police hliam tuar, damdawi-ina enkawl mekte chu union home minister Amit Shah chuan Nilaini khan a tlawh. Buaina chhuakah hian police 394 in hliam an tuar a, police motor 30 tihchhiatsak an ni bawk a ni.
Nimin khan Delhi police-te chuan loneitu pawl hruaitu 20 vel hnenah hriattirna pein, tractor rally neihnaa buaina chhuak chungchangah an laka action lak a nih lohna chhan tur sawifiah turin a ti a, ni thum chhunga chhanna thehlut turin a ti nghal bawk.