Ivanka leh Jared Kushner-te'n Donald Trump zui dawn

US president Donald Trump leh a nupui Melania Trump-te'n kar leh, February 24 leh 25-a India an rawn tlawh turah an fanu-te nupa,  Ivanka Trump leh Jared Kushner-te chuan an ṭawiawm dawn.

Ivanka leh Jared-te hi US President adviser an ni a, India an rawn tlawh hunah hian New Delhi an pan hmain Ahmedabad leh Agra an tlawh hmasa phawt dawn a; Agra-ah hian Taj Mahal an tlawh dawn a ni.

Ivanka hi chu No­vember 2017 khan India-ah rawn zin tawhin Hyderabad a tlawh a ni.

Anni pahnih bakah hian Commerce Secre­tary Wilbur Ross, Energy Secretary Dan Broui­llette, NSA Robert C O’Brien leh White House Chief of Staff Mick Mul­vaney-te pawhin Trump hi an rawn zui dawn a ni.

Trump-te chhungkua, a bikin Ivanka leh Melanie zin dun tur hian White House-in India a ngaihpawimawhzia a tilang niin mi tam tak chuan an ngai a, an ram chhuahsana ram danga an zin dun hmasakna ber tur pawh a ni hial mai thei niin Indian Express chuan a tarlang.

President Trump leh amah zuitute hi India ramah hian darkar 36 chhung an awm dawn a, mahse hemi atan hian India chu nasa taka inbuatsaihin sum pawh a seng hnem hle. Ahmedabad-a Sardar Vallabhbhai Airport-ah a rawn ṭum dawn a, darkar thum chhung vel Ahmedabad khawpuiah hian an awm dawn a, hemi atana lo inbuatsaih a, khawpui chei nan hian cheng vaibelchhe 80-85 vel sen a ni. 

Taj Mahal pawh an tlawh dawn avangin Taj Mahal bula Yamuna lui chu thenfai niin, tui thianghlim cusec 900 chuang zet dah luh a ni bawk.