Sorkarin Rajiv Gandhi thattu chhuah remti lo

Sorkar laipui chuan Madras High Court hnenah, prime minister hlui Rajiv Gandhi thahna thubuaia thiam loh chantirte chu a pawmpuina tel loin chhuah zalen theih an ni lo tih a hrilh.  Tamil Nadu cabinet-in chhuah an nih theihna tura resolution a lo pass tawh pawh chuan awmzia a nei dawn lo tih a hrilh bawk. 

Kum 1991-a Rajiv Gandhi thattua puh, damchhung tang tura thiam loh chantir zinga mi, Nalini Sriharan chuan High Court-a hian petition thehlutin, kum 2018-a state cabinet-in thurawn lo pe tawh mah se, Tamil Governor chuan a chhuahna tur thupek a la siam duh lo niin a sawi. Dan dik loa hren chhunzawm a nih thu sawiin, chhuah turin a dil a ni. 

Nalini petition thehluh ngaihtuahtu, justice R Subbiah leh R Pongiappan awmna bench hnenah, sorkar aiawh Additional Solicitor General (ASG) G Rajagopalan chuan Nalini dilna hi a pawm loh thu leh, Governor hminga thupek siam engmah a la awm loh avangin hren a nih dan pawh dan kalh a la ni thei lo tih a sawi. State cabinet-in resolution an lo pass tawh pawh Nalini chhuahna tur thupek a ni lo, a ti bawk. 

Tamil Nadu State Public Prosecutor A Natarajan pawhin state cabinet hian Governor hnenah chhuah tura ngenna resolution an siam ringawt a ni, a ti. Governor hnenah hian ngenna an siam thei a, thu an pe thei lo tiin, thutawp chu Governor-in a siam tur a ni, a ti. Governor-in thupek a tihchhuah hma chuan Nalini hi dan kalha hren chhunzawm tia sawi theihna tur a awm loh thu a sawilang ve bawk.