Rahul Gandhi-an UP-ah rally vawi 13 nei dawn Congress-in LS seat 80-ah chuh vek tum

Uttar Pradesh-ah Mayawati kaihhruai Bahujan Samaj Party (BSP) leh Akhileh Yadav-a party Samajwadi Party (SP)-ten Lok Sabha inthlanpui neih tur atana thawhdunna tur an tihfel hnuah, Congress party pawhin nasa zawka ṭan lak tumin ruahmanna a siam. 

Congress party chuan Lok Sabha inthlanpui neih tura UP-a seat awm zawng zawng, seat 80-ah candidate dah vek a tum tih a sawi a, inthlan neih tur pual hian party president Rahul Gandhi chuan rally ṭum 13 neih a tum bawk. 

Party senior leader Ghulam Nabi Azad leh party Uttar Pradesh in-charge Raj Babbar-te chuan nimin khan meeting neiin, party hmalak dan turte an ruahman a ni. State hmar lam aṭanga beihpui thlak ṭan an tum thu sawiin, rally hi Hapur, Moradabad leh Saharanpur-ahte bul ṭan a ni ang. 

BSP leh SP hian kar kalta khan seat insem dan tur pawh an rel fel tawh a ni. Lok Sabha seat 80 awmah party pahnihte hian seat 38 ve veah an chuh dawn a, seat hnih chu an thawhpui dang, Rashtriya Lok Dal tan an dah. Seat dang pahnih, Congress president Rahul Gandhi leh a nu Sonia Gandhi-te bial, Amethi leh Rae Bareliah-te candidate siam an tum lo thung. BSP-SP thawkdun leh Congress party hi thawkho dawn lo mah se, Gandhi-te nufa bial erawh Congress tan hian ken an tum ve ve a ni. 

Uttar Pradesh-ah Congress party hian kum 1992-a Babri Masjid tihchhiat a nih aṭang khan thuneihna a chang tawh lo a ni. State-a rorelna hi BSP leh SP hian an inchelh chhawk a, nikuma assembly inthlanah khan BJP chuan seat 71 zet lain sorkarna a siam a ni. Mahse BJP sorkar hnua by-poll neihah SP leh BSP hi thawkdunin an chak chho zui a ni.