Congress-in CVC hotu ban an phut

Congress party chuan Central Bureau of Investigation (CBI) director aṭanga Alok Verma ban a nih chungchangah Central Vigilance Commission (CVC) KV Chowdhary chu ban ve nghal turin a phut a, Rafale deal chungchang chhuina pumpelh a nih theih nana sorkar laipuiin a duh ang anga a thunun theiha awma a puh bawk. 

Congress party-in CVC hotu a puhna chungchang hi CVC leh sorkar lam chuan an la chhang let lo. 

New Delhi-a AICC headquarters-a press conference a neihah, Congress thupuangtu Abhishek Manu Singhvi chuan CVC hotu chu ram danpui palzutah puhin ban an phut tih a sawi a, a hna chelh chhunzawm zel tlaka an ngaih loh thu a sawi. 

Kar kalta Ningani khan Prime Minister Narendra Modi-a kaihhruai high-powered panel chuan Vermna hi CBI director aṭangin a ban a ni. Singhvi chuan Vermna leh CBI Special Director Rakesh Asthana-te inkar buaina awm chungchangah Chief Vigilance Commissioner hi Asthana lamah ṭang tlatlin a palai ang mai a chet thu leh, sorkarin thuchah kengtu leh a hna tenawm tak thawktu ang maia a chet thu a sawi. Vigilance commissioner hian mipuite ṭhatna tura dik taka ro rel tur a ni tih a intheihnghilh a, politician-te milem che thei ang maia a awm zawk thu a sawi. Hetianga commissioner a chet chhan chu zawhna lian tak a nih tih sawiin, tu thupek anga che nge a ni tiin a zawt let nghal bawk.