Congress-in Pakistan puihna an dil: Defence Minister Sitharaman

Defence Minister Nirmala Sitharaman chuan eptu party Congress chu Prime Minister Narendra Modi paihthla tura Pakistan puihna dilah a puh. Sitharaman hian Pakistan chu Modi-a kaihhruai sorkar chet ṭhat avangin khawthang ram te'n an enhrang ṭan niin a sawi bawk.

"Congress party hian politics tenawm tak an khel mek a, Prime Minister an nekchhuah theih nan Pakistan puihna an dil a ni," tiin Congress chu India nena innghirngho reng Pakistan puihna mamawh an nih thu sawiin, BJP party mite chu an sorkar thil tihṭhat puang darh nasa tura a duh thu a sawi. 

India hmeichhia zinga Defense Minister ni thei pahnihna Sitharaman hian sawi chhunzawmin, "A hmasa berah chuan BJP sokarna chan hnu kum 2014 hnuah hian firfiak pawl chetna liantham a thleng tawh lo a ni. India ram tichhiat duh firfiak pawl reng reng chu India ramriah tukdawl zel an ni. Hei mai bakah eirukna tel loin kum nga chhung kan sorkar a ni," tiin an party chu an sorkar chhungin mipui rawngbawltu an nih thu a sawi.