UP leh Bihar-ah BJP an tla dawn - RJD Tejashwi Prasad

Rashtriya Janata Dal(RJD) hotu leh Bihar Deputy Chief Minister hlui Tejashwi Prasad chuan Bahujan Samaj Party(BSP) party hotu Mayawati hmuin Lok Sabha inthlan lo awm tura Samajwadi Party nena an thawhdun dawn avangin lawmthu a hrilh. Tejashwi leh Mayawati-te hi Mayawati chenna inah an inkawm a, Uttar Pradesh mai bakah Indian politics dinhmun an sawi dun nasa hle nia tarlan a ni. 

"Lalu khan Uttar Pradesh-a thawhpui neih hi a duh reng ṭhin a, Mayawati leh Akhilesh Yadav-te'n election an chuh dun hi a duh dan a ni," tiin Bihar Chief Minster hlui leh a pa ni bawk Lalu Prasad Yadav duh dan anga an party a kalpui thu a sawi. Mayawati nena inkawmna an neih hnuin Tajeshwi Yadav chu a inringtawk sawt hle a, UP leh Bihar lamah chuan sorkarna siam mektu Bharatiya Janata Party (BJP) tan hmun a awm loh tur thu a sawi.

"Tun dinhmuna a lan dan chuan BJP sorkar hian Baba Saheb-a duhdan anga Constitution kalpui hi ṭhiah a, Nagpur Law kenkawh an duh a ni. Mipuite hian Mayawati leh Akhilesh-a te hmalak dan hi an duh em em a, BJP tan chuan chak beisei ngam chi a ni lo. SP leh BSP thawkdun hian seat an la vek dawn a, BJP tan chuan seat khat lek pawh a awm lo ang," tiin sorkar lai BJP tan Bihar leh UP lama chak beisei chi a nih loh thu a sawi a ni.