AAP hotu Kejriwal-a'n Lok Sabha inthlan a chuh dawn lo

Aam Aadmi Party hotu leh Delhi Chief Minister ni mek Arvind Kejriwal chuan April thla aṭanga neih tan tur Lok Sabha inthlanah Varanasi atanga seat a chuh loh tur thu Aam Aadmi Party chuan an tichiang.

"Kejriwal hian Lok Sabha inthlanah seat a chuh dawn lo a, Chief Minister a nihna Delhi lamah insawrbing a duh zawk a ni. Delhi, Punjab, Haryana leh Goa a seat awm zawng zawng erawh kan chuh vek dawn a, Uttar Pradesh lamah pawh seat tlem azawng kan chuh bawk ang. Thil tihfel tur ṭul ang angte chu February thlaah kan tifel ang," tiin AAP thupuangtu leh Rajya Sabha MP ni bawk Sanjay Singh chuan press mite a hrilh. 

Singh hian sawi chhun-zawmin, "Delhi lamah chuan kan party hian zirna, kut hnathawktute, kawlphetha leh tui thianghlim intur lamah kan insawrbing mek a ni. Ram pum huSap politics lamah kan zuanglut dawn a nih chuan mitin tana zirna mai bakah miretheite tana a thlawna zirna, ṭhalaite tana hna siam leh Sawminathan Commission rawtnate kan ngai pawimawh ang," tiin central lama inzarpharh an tum thu a sawi lang.