CBI hotu ruat tura committee meeting ko turin PM ngen

Lok Sabha-a Congress party hruaitu Mallikarjun Kharge chuan Prime Minister Narendra Modi hnenah Central Bureau of Investigation (CBI) hotu Alok Verma ban a nih hnua CBI interim director atana M Nageswara Rao ruat a nih chu a duh lo  thu sawiin, CBI hotu thar ruat tura selection committee meeeting ko thuai turin a ngen. 

Mallikarjun Kharge hi CBI hotu a nihna aṭanga Alok Verma bantu, PM kaihhruai selection committee-ah hian member a ni. 

Kharge chuan CBI interim chief atana Rao ruat a nih dan chu dan kalh niin a sawi. Hemi rual hian selection committee-in CBI hotu aṭanga Verma a banna chhan, Central Viligance Committee (CVC) report chu  mipuite hmuha tlangzarh turin a phut bawk. 

PM hnena lehkha a thawnah, Kharge chuan sorkar laipui chuan CVC report hi tlangzarhin, Justice (retd) AK Patnaik report leh January 10-a meeting  minute-te pawh puanzar a ni tur a ni, a ti. 

Thawhṭanni khan NGO Common Cause chuan Supreme Court-ah CBI interim Director atana Nageswar Rao ruat a nih chungchang hi an khing let bawk. NGO petition thehluhah hian January 10-a sorkar laipuiin CBI hotu lailawk atana Roa a ruatna thupek chu hnawlsak turin court hi an ngen a ni. 

Advocate Prashant Bhushan kaltlanga PIL thehluhah hian sorkar laipui chu Lokpal and Lokayuktas Act, 2013 in a lo siamṭhat tawh, Delhi Special Police Establishment Act, 1946 Section 4A in kaihhruaina a siam chu zawma, CBI regular Director ruat turin sorkar chu an phut tih an tarlang.