Army Day vawi 71-na lawm

India mite zinga Indian Army-a commander-in-chief ni thei hmasa ber, Field Marshal Kodandera M Cariappa-an a hna a zawm ni, January 15 chu Indian Army Day atan hman ṭhin a ni a, nimin khan Army Day vawi 71-na hi lawm a ni. 

Indian Army Day vawi 71-na pual hian President Ram Nath Kovind leh Prime Minister Narendra Modi-te chuan sipaite duhsakna an hlan a, President chuan sipaite chu India ram inchhuanna an nih thu sawiin, anmahni avangin mipuite pawh thlamuang takin an mu thei a ni, a ti. Sipaite leh an chhungte chu duhsakna sang ber a hlan thu a sawi. 

Prime Minister pawhin sipaite duhsakna hlanin, India ram chuan an inpeknate chu a chhuang takzet tih a sawi. 

Army Chief Genral Bipin Rawat chuan sipaite leh an chhungte duhsakna a hlan bawk. Khawmual sipai hotu lu ber chuan Pakistan ramri-a firfiak che ṭhinte lakah Indian Army-te chuan a ṭul anga action lak an hreh dawn lo tih a sawi nghal. Ramri-a boruak muanawm a awm theihna turin sipaite chuan hma an la a, sipaite pawh tuaithar leh tihchangtlung zel an ni, a ti. Eastern sector-a China nena ramri dinhmun pawh uluk taka an thlithlai reng tur thu a sawi bawk.