A ruala sakhaw danga inleh hi ngaihven a ngai : Rajnath Singh

Union Home Minister Rajnath Singh chuan Thawhlehni-a Kristian pawl pakhatin New Delhi-a inkhawm a buatsaih chu hmanpuiin, inthlana an chak emaw chak lo emaw mipuite ang khata vek an en tur leh, inthliarhranna an kalpui loh tur thu a sawi. Hemi rual hian ram chhung hmun hrang hranga a ruala sakhaw danga inlehna thleng ṭhin chu enfiah a ngaih tih a sawi bawk. 

Singh chuan sakhaw tinte zalenna chu a thlawp tih a sawi rualin, a ruala sakhaw danga inlehna thleng ṭhin chu eng ram tan pawh thil ngaihven ngai tak a nih tih a sawi. 

Rashtriya Isai Mahasangh-te function buatsaiha thu a sawiah Rajnath Singh chuan, " Hnam, thurin leh sakhua vangin tumah enhran leh thliarhran ka nei ngai lo. Sorkar kan siam emaw, siam lo emaw tumah kan enhrang dawn lo. Hei hi kan prime minister ngaihdan pawh a ni", tiin a sawi. Mipuite hmangaihna tel loin ro a rel theih loh tih a sawi bawk. 

Singh chuan miin a sakhaw zui a thlak a, a duhthu ngeia sakhaw dang a zawm duh a nih chuan a ti mai tur a ni a, dodalna a awm tur a ni lo, a ti. Mahse hemi rual vek hian a ruala mi eng emaw zatin an sakhaw zui an thlak a nih chuan, eng ram tan pawh ngaihzam mai thei a ni lo tih a sawi. "Hindu i nih chuan Hindu ni mai la, Muslim pawh Muslim ni se, Kristian pawh Kristian ni mai rawh se. Engvangin nge khawvel hi sakhaw danga inleh tir in duh kher ni?" tiin a sawi.

Khawvel ram hrang hrangah, Britain leh America ramah ngei pawh sakhaw tlem zawkte chuan inleh khapna, anti-conversion law siam an phut a, India ramah pawh mi tam takin he dan hi hman an phut a ni, a ti.