Jan 19-ah Kolkata-ah opposition rally nei dawn

January 19 hian West Bengal khawpui, Kolkata-ah Bengal Chief Minister Mamata Banerjee  kaihhruai Trinamool Congress chuan rally an huaihawt dawn a, he hunah hian ramchhung hmun hrang hrang aṭangin BJP nilo political party hruaitute an tel dawn. 

Mamata Banerjee chuan rally an huaihawt turah hian Kashmir aṭanga Kanyakumari thlengn non-BJP party hruaitute an tel dawn tih a sawi a, ram hruaitu langsar tak takte, prime minister hlui bakah chief minister hlui eng emaw zat an rawn tel dawn a ni, a ti. 

Congress president Rahul Gandhi leh a nu Sonia Gandhi-te chuan rally hi an tel theih dawn loh thu an lo sawi tawh a, mahse an party aiawhin Lok Sabha-a Congress leader Mallikarjun Kharge a tel thung ang. 

Banerjee-i chuan Left party-te pawh tel tura a sawm thu sawiin, CPI-M leader leh Kerala Chief Minister Pinarayi Vijayan pawh a sawm a, mahse an tel dawn leh dawn loh an la tichiang lo niin a sawi. 

Kolkata Brigade Parade Ground-a rally an neih tur hi kum sawmli chhunga India khawchhak lam biala public meeting lian ber a nih tur thu Banerjee chuan a sawi.