Supreme Court-in Nageswara Rao chungchang a ngaihtuah dawn

Central Bureau of Investigation (CBI) Director lailawk ni tura M Nageswara Rao ruat a nih chungchang NGO, Common Cause leh social activist Anjali Bhardwaj-te'n ennawn tura an ngenna chu Supreme Court chuan karleh lamah a ngaihtuah dawn. 

Petition thehluttute hian Nageswara Roa chungchang hi ngaihtuah nghal turin an ngen a, mahse court chuan hei hi hnawlin karleh lama ngaihtuah turin a dah ta zawk a ni. 

Advocate Prashant Bhushan hmanga ngenna siamah hian Nageswara Rao ruat a nih dan chu dan kalha kalpui a nih thu an tarlang a,  Delhi Police Special Establishment (DPSE) Act dan zawm loa kalpui a nih thu an tarlang a ni. 

M Nageswara Rao hi January 10 khan CBI Director lailawk ni tura ruat a ni a, ruat a nih hnu lawkah hian CBI Director kalchhuak ta Alok Verma-a'n a ban hma ni hnih chhunga thutlukna a lo siam tawh chu a ti danglam nghal vek a ni. CBI inrelbawlnaah Prime Minister Narendra Modi a inrawlh nasa niin sawiselna a nasa hle a, Reserve Bank of India nen pawha lo inbakkhaih tawh Modi hian duhsak takin a tihkual theih tur M Nageswara Rao a ruat niin thuthang a tam hle bawk.