Modi leh Putin-ten meeting nei

Prime minister Narendra Modi leh Russia president Vladimir Putin-te chu nimin khan Vladivostok, Russia-ah an inkawm. Hruaitu pahnihte meeting zawh hnu  hian ram pahnihten thawhdunna tur inremna thuthlung eng emaw zat an ziak zui nghal a ni.  

Thawhdunna tur inremna ziah  hnua chanchinthar lakhawmtuten an kawmnaah, PM Modi chuan India leh Russia chuan ramchhung inrelbawlnaa ramdang inrawlh chu an duh lo tih a sawi. Ram pahnihte chu global forum hrang hrangah an thawkdun tih sawiin, inlaichinna nghet zawk an neih theihna turin thawhdunna sector thar pawh an neih belh zel a ni, a ti. 

India prime minister zinga Vladivostok kal hmasa ber a ni chu lawmawm a tih thu sawiin, he hmuna kal tura sawmtu Russia president Putin chungah a lawm hle tih a sawi bawk. Kum 2001 khan Russia-a annual summit neih hmasa berah Gujarat chief minister a nih laia a kal tawh thu a sawi. 

Modi chuan Russia-in civil mite hnena chawimawina a hlan sang ber, Order of St Andrew the Apostle hlan a tum chungchangah Russia ram leh Russia mipuite chungah lawm thu a sawi bawk. Modi hi  Vladivostok-a 5th Eastern Economic Forum-ah chief guest tura sawm a nih avangin a zin a ni.