Manmohan Singh-a thusawi ngaithla ru: Shiv Sena

BJP thawpui Shiv Sena chuan prime minister hlui Manmohan Singh-a'n tunhnaiah inrelbawlna fel loh vangin India economy a chhia tih a sawi chu thlawpin, sorkar laipui hnenah India ram ṭhatna turin Manmohan Singh-a thusawi ngaithla ru, a ti.

Manmohan Singh-a'n sorkar laipui a sawiselna hi Modi sorkar chuan an pawm loh thu an sawi a, hemi hnu hian Sena hian Manmohan Singh an thlawp thu hi an sawi zui leh a ni. Sorkar laipui chuan Thawhlehni khan Singh-a thusawi chu a pawm lo tih leh a PM hunlaia economy lian ram 11-na ni ṭhin kha tunah chuan economy lian ram pangana a nih tawh thu an sawi.

Shiv Sena chuan hei hi an party chanchinbu Saamana editorial-ah chhanglet zuiin, PM hlui thusawi chungchang chu politics nena kaikawp loa ram ṭhatna atana ngaithla zawk turin an ti. Kashmir leh economic tlak chhiatna chu thil dang daih a ni, mi thiam Manmohan Singh-te ang thurawn chu lak a ṭul a ni, tiin an ziak.