Aircel Maxis case-a Chidambaram bail dilna phalsak

Delhi court chuan union  minister hlui P Chidambaram leh a fapa Karti Chidambaram te chu Central Bureau of Investigation (CBI) leh Enforcement Directorate-in Aircel Maxis case an thehluha anticipatory bail an dilna chu nimin khan a phalsak. 

Special Judge O Paini chuan Chidambaram-te pafa anticipatory bail dilna hi phalsakin, thubuai chhuinaah pawh thawhpui turin a hrilh nghal a ni. Chidambaram-te fapa hi Aircel-Maxis case bakah, INX Media case-ah thubuai siamsak an ni. 

P Chidambaram hi INX Media case-ah CBI-in manin, ni 15 chhung an hreng tawh a ni. He thubuaia anticipatory bail a dilna chu Supreme Court chuan a hnawlsak avangin, Chidambaram hi Tihar jail-ah emaw, police lock-up ah emaw dah zui a nih rin a ni. 

Supreme Court chuan investigating agency chuan a duh anga thil a chhui theihna turin zalenna a nei tur a ni tiin, Chidambaram hi anticipatory bail phalsak a nih chuan an thil chhuina kawngah harsatna a thlen thei a ni, a ti. 

Enforcement Directorate chuan Chidambaram hi union finance minister a nih laiin, a fapa Karti hlawkna turin INX Media hnena Foreign Investment Promotion Board (FIPB) clearance peknaah a thuneihna dik lo taka  hmanga puh a ni.