Russia-ah Modi leh Shinzo Abe inhmu

Ni hnih cham tura Russia-a zin, prime minister Narendra Modi chuan nimin khan Japan Prime Minister Shinzo Abe chu Vladivostok-ah a hmu.

Modi leh Abe hi June thlaa Osaka hmuna G-20 Summit neiha an inhmuh hnua  an inhmuh lehna hmasa ber a ni. India leh Japan hi inṭhianṭha tak niin, kawng hrang hranga thawhdunna pawh nei mek a ni. Tunhnai khan India leh Japan chuan Defence Ministerial meet, Japan khawpui Tokyo-ah an nei a, PM Modi leh Japan PM Shinzo Abe-te chuan kum 2017 khan Gujarat-ah, Ahmedabad-Mumbai High Speed Rail Network lungphum an lo phum tawh bawk a ni 

External Affairs Ministry thupuangtu Raveesh Kumar chuan Modi leh  Abe-te inhmu hian, economic, defense, security, start-up leh 5G lama ram pahnihte thawhdunna tur an sawi tih a twitter-ah a tarlang. PM Modi hi Russia khua Vladivostok-a Eastern Economic Forum buatsaih ‘Far East Street’ exhibition-a khuallian tura kal a nih mai bakah, 20th India-Russia annual summit nei tura kal a ni bawk. Modi hi Vladivostok International Airport-ah guard of honour nena lo hmuah a ni.

‘Far East Street’ exhibition-ah hian sumdawnna leh investment lama thawhdunna lam sawi a ni. 20th India-Russia annual summit neihah hian ram pahnihten thawhdunna tur inremna thuthlung eng emaw zat an ziak bawk.