Sorkarin petrol leh diesel hmang chi lirthei hman khap dawn lo

Union Minister for Road Transport and Highways Nitin Gadkari chuan 59th Annual SIAM Convention neihah, sorkar laipuiin petrol emaw diesel emaw hmang chi lirthei hman khap tumna a neih loh thu nimin khan a sawi.

Society of Indian Automobile Manufacturers (SIAM) ngenna angin petrol leh diesel hmang chi lirthei mai bakah electric hmang chi lirtheia GST lak ṭhin chu tihtlem a nih theih nan finance minister sawipui a tum thu Gadkari chuan a sawi bawk.

59th SIAM Convention-ah hian Gadkari chuan Indian automobile sector a tlakhniam thu sawiin, bank leh Non Banking Financial Company (NBFC)-te'n pawisa duh anga an pek chhuah ṭhat tawk loh vanga tlahniam a nih thu a sawi. Thil siamchhuaktute chu fuihin, anmahniin sum hnar an zawn theih thu a sawi a, India ram chu khawvela 'manfacturing hub' lian ber a nih theih thu a sawi a ni.

Gadkari chuan sorkarin industry-te a puih tur thu sawiin, Ministry of Road Transport and Highways kaltlangin road project 68, vaibelchhe nuai 5-hu commercial vehicle-te puihna tur kalpui a nih dawn thu a sawi. Sorkar hian lirthei chungchangah hian kawng hrang hrangah harsatna tawkin, crude oil lakluhna man sang zel vanga harsatnate, boruak bawlhhlawh leh kawngpuia mipui himna ngaihtuah kawngahte a ni. Heng harsatna tihziaawm a nih theih nan, cheng vaibelchhe 50,000 ruahman a nih thu leh, Delhi boruak bawlhhlawh 29% thunun a nih theih nan sorkarin a hma lak dawn thu pawh a sawi a ni.