Misual hmaituamte'n JNU campus luhchilh

Pathianni zan khan Delhi-a Jawaharlal Nehru University (JNU) campus chu misual hmaituamte'n hmanrua nen luhchilhin, zirlai leh zirtirtute an bei a, mi 34 zet an hliam a, damdawi-inah dah luh an ni.

Pawikhawihtute hi tute nge an ni tih hriat chian la ni lo mah se, JNU students' union chuan RSS zirlai pawl, Akhil Bharatiya Vidyarthi Parishad (ABVP) misual rual niin an twitter-ah a tarlang. JNU zirlaite hian Citizenship (Amendment)Act (CAA) dodalna an thlawp avangin eptu lam pawhin campus chhunga pawikhawihna thlengah hian BJP sorkar demna an sawi chhuak nasa hle. 

Mita hmutute sawi danin campus luhkhungtute hi mi 50 rual zet niin an sawi. Pathianni zan dar 6.30 vel khan campus-ah hian lutin zirlaite kut an thlak a, zirlaite lo chhan tumtu zitirtute pawh kut an thlak zui bawk.

Heng misualte hian tiang, thir tiang, tuboh lian leh lungte an keng lut a, zirlaite leh zirtirtute kut an thlak bakah bungruate pawh an suasam nasa hle. 

Zirlai hliam tuar zingah hian Jawaharlal Nehru University Students Union (JNUSU) President Aishe Ghosh leh General Secretary Satish Chandra te pawh an tel. Campus chhunga pawi-khawihna a thlen hnu hian Pathianni zan khan police-te chuan flag march an nei nghal a, mahse mipui pungkhawm thinrim chuan police-te chu an mawhphurhna hlen zo loa puhin, kal bo turin an lo au el a ni.

Pathianni zan tlai tawh takah khan Delhi Police headquarters kawtah JNU campus chhunga pawikhawihna thleng duh lohna lantirin mi tam tak an pungkhawm bawk. 

JNU Students Union chuan campus chhunga pawikhawihna thleng vang hian Vice-Chancellor Mamidala Jagadesh Kumar chu bang turin an phut. JNUSU chuan thuchhuah siamin,Vice-Chancellor chu mi dawihzep, a ruka policy ṭha lo tak hmang leh, zirlai leh zirtirtu lak aṭanga tlanchhe zelah an puh.

JNU-ah hian thla hnih chuang zet chu hostel fee tihsan chungchangah zirlai leh university thuneitute chu an lo inep tawh a; zirlaite chuan an fee tihsanna hi a let thum zet nia sawiin, fee sanna hi sut turin an phut. Campus chhunga tharum thawhna thengah VC chu mawhphurtuah an ngai tih sawiin, zirlaite kutthlak leh bungrua suasam turin misual rualte a hmang niin zirlai pawl chuan a puh. 

Misualten JNU campus luhchilh a, zirlaite kut an thlak duh lohna lantirin Pathianni zan aṭang khan Mumbai zirlai ṭhahnem tham tak chu Gateway of India-ah pungkhawmin lungawi lohna an lantir a, nimin thleng khan an la awm khawm chhunzawm zel.

Zirlai pungkhawmte hian JNU-a pawikhawihna thlentu nia sawi, ABVP demna thuziakte an keng bawk. Mumbai-a zirlai pungkhawmte hi TISS, ITT, University of Mumbai leh zirna in danga mite an ni a, eng chen nge Gateway of India-ah hian an pungkhawm dawn tih an sawi lawk thei lo tih an sawi bawk. 

Mumbai bakah Uttar Pradesh-a Aligarh Mulim University, Bengal-a Jadavpur University, Pune-a Film and Television Institute of India zirlaite bakah, university dang eng emaw zat zirlaiten JNU zirlaite chunga thil thleng duh lohna an lantir bawk a ni. 

Delhi police-te chuan JNU campus-a pawikhawihna thleng vang hian FIR an ziaklut a, thubuai hi Crime Branch kutah hlan a ni nghal bawk. Crime branch top official pahnih chuan nimin khan Lieutenant Governor Anil Baijal hmuin, thil awmdante an sawipui nghal. 

Police-te hian buaina a chhuah hnu, Pathianni zana varsity North gate pawn lama tlanchhiat tum mi pali an man a, heng mite hi thu zawhfiah mek an ni tih an sawi.