Tihar Jail-ah Chidambaram tantir
Union finance minister hlui P Chidambaram chu Ningani zan khan Tihar Jail-ah dah a ni.
INX Media corruption case-ah Congress party hruaitu Chidambaram hi thubuai siamsak a ni a, Ningani khan Supreme Court-in anticipatory bail a dilna chu a hnawlsak a, ni 14 chhung judical custody a awm turin a ti.
Hemi zan vek hian Chidambaram hi Tihar Jail-ah hian dahluh nghal a ni. Chidambaram hi Jail No.7-ah dah a ni a, hei hi Enforcement Directorate (ED) in thubuai a siamsak an dahna ṭhin a, Jail-ah dahluh a nih hma hian
Chidambaram hi a hriselna dinhmunte an endik hmasa phawt bawk. Jail-ah hian Chidambaram hi duhsak bikna engmah pek a ni lo a, cell hran leh western toilet erawh pek a ni chauh tih prison official-te chuan an sawi. Tang dang ang bawkin tan-in chhunga library hman theih hun leh TV en theih hunte siamsak a ni bawk.
INX Media case kaihhnawihah vek hian nikum khan Chidambaram-a fapa, Karti Chidambaram chu a pa tanna cell-ah hian ni 12 chhung dah a lo ni tawh a ni. Chidambaram-te hi INX Media case-ah hian August 21 khan Central Bureau of Investigation (CBI) chuan manin, CBI kutah hian ni eng emaw zat a awm hman a ni. Hemi chhung hian he thubuai kaihhnawihah hian zawhna 400 chuang zet zawh hman a ni tih agency lam chuan an sawi.
Zawhnate hi puanzar ni lo mah se, a tam zawk chu a fapa Karti Chidambaram leh Chess Management Pvt Ltd leh Advantage Strategic Consulting Pvt Ltd (ASCPL)-te inzawm dan leh, INX Media co-founder Indrani Mukerjea leh Peter Mukerjea-te nena an indawr dan chungchangte niin an sawi.