Kerala-a dan loa in sak tichhe turin thu pe

Supreme Court chuan Kerala-a Ernakulam district-a Maradu municipality hnuaia dan loa in sakte chu tichhe tura hriattirin, September 20 thleng hun a pe. 

Justice Arun Mishra leh MR Shah awmna bench chuan Kerala chief secretary hnenah, September 23-a hearing neih hunah tel turin a hriattir bawk.  Court chuan Kerala counsel G.Prakash-a'n court thupek zawm tura kar li tal hun pe tura a dilna chu a hnawlsak a, hemi rual hian May 8-ah apartment tichhe tura thupek a lo tihchhuah tawh a zawm loh vangin Kerala state sorkar chu a khak zui nghal bawk. 

Supreme Court hian May 8 khan dan loa Maradu municipality huamchhunga  flat 350 sakte chu thla khat chhung ngeia ṭhiat turin thupek a lo tichhuak tawh a ni. Heng flat-te hi Nettoor-a Alfa Ventures twin complex, Kundannoor Holy Faith H20, Holiday Heritage, Jain Coral Cove-te an ni. Flat an sakna hmun hi CRZ-3 (Coastal regulation zone) law-in a huam chin a ni. He hmuna in sak phalna hi kum 2006-07 khan Maradu municipality chuan Kerala Coastal Zone Management Authority hriattir loin a lo pe a ni. Hei hi Supreme Court-a thlen a nih hnuah, court chuan CRZ-3-in a huam chin, tuipui kam aṭanga meter 200 huam chhunga eng in mah sak phal a ni loh tih sawiin, in sak tawhte pawh hi ṭhiat turin a ti ta a ni.