India leh South Korea-ten MoU ziak

Asia ram hrang hrang tlawha zin mek defence minister Rajnath Singh chuan nimin khan India leh South Korea ram pahnihte thawhdunna tur, Memorandum of Understanding (MoU) pahnih an ziak tih Defence Ministry official chuan an sawi.

Rajnath Singh hi South Korea-a nithum a han cham chung hian SKorea national defence minister Jeong Kyeong-Doo nen meeting neiin, defence educational exchange lamah leh navy lama thawhdunna tur an ziak dun a ni.

Hei bakah hian Seoul National Cemetery a tlawh a, SKorea khawpui Seoul-a War Memorial pawh a tlawh bawk. Indian 60th Para Field Hospital-ten Korean War hunlaia Korea an puih avanga citation an dawn chu, a copy Singh an pe ve a ni. Korean war-a UN sipate inpumpekna leh huaisenna chu engtikahmah theihnghilh a nih tawh dawn loh thu, Singh chuan a twitter-ah a ziak.

India leh South Korea hi tunhma aṭang pawha ram inngeih tak an ni a, kawng hrang hranga thawhdunna tur pawh tam tak ziah a ni tawh bawk. Ram pahnih inkarah hian Special Strategic Partnership kal pui mek a ni.