Unnoa rape survivor accident case SC-in CBI kar hnih hun pek belh

Unnoa-a pawngsual tawktu leh a lawyer accident tawh chungchang chhuinaah Supreme Court chuan nimin khan Central Bureau of Investigation (CBI) chu kar hnih hun a pek belh.

Justice Deepak Gupta leh Justice Aniruddha Bose-te kaihhruai bench chuan Delhi high court special judge pawh hun pek belhin, a rang thei ang bera thutlukna siam turin a hriattir bawk. Special Judge ngenna ang hian bench chuan Delhi High Court chu Delhi-a AIIMS-ah special court buatsaih turin a ti a ni. Unnoa-a pawngsual tawktu leh a lawyer-te hi Uttar Pradesh-a na taka accident an tawh hnuah AIIMS-ah enkawl mek an ni.

Accident thlen dan hi CBI chuan a chhui mek a, mi ṭhenkhat chuan CBI hian accident tawkte statement hi September 2 khan an la tawh niin an tarlang. July 28 khan pawngsual tawktu, a nuteite pahnih leh a ukil-te chu Unnao a-

ṭanga Raebarel an pan laiin truckin an chuanna chu na takin a su a, a nuteite hi an hliam tuar loin an thi nghal. Pawngsual tawktu leh a lawyer erawh hi chu vanneih thlak takin an damchhuak hlauh a, an hliam erawh a na hle.

Hun eng emaw chen Uttar Pradesh-ah enkawl an nih hnuah an dinhmun a ṭhat loh avangin Delhi-a AIIMS-ah sawn an ni.

Unnoa pawngsual thubuaiah hian BJP MLA Kuldeep Singh Senga chu a inrawlh nia puh a ni a, BJP pawhin an party aṭangin an hnawtchhuak tawh. Kuldeep Singh Senga hian 2017 khan kum tling lo hmeichhia hi Unnoa-a a chenna ina hna beiseia a kal chu a lo pawngsual niin an sawi.

July thlaa accident kaihhnawihah hian Sengar lakah hian thubuai ziahluh leh a ni a, tunah hian Delhi-a Tihar Jail-ah tantir mek a ni.