Chandrayaan-2 Lander Vikram hmu tawh, biakpawh tum mek

Indian Space Research Organisation(ISRO) chuan nimin khan Inrinni zinga chin hriat loa bo ta Chandrayaan-2 lander Vikram chu an hmu tawh tih an sawi.

ISRO chief K Sivan chuan Pathianni khan Vikram chu an hmu tawh tih sawiin, orbiter thlalak aṭangin a awmna an hmu thei tih a sawi, an la bepawp thei lo tih leh biakpawh an tum mek thu a sawi a ni. K Sivan chuan kan bepawh thei thuai ang, a ti.

ISRO hian July 22 khan Chandrayaan-2 hi Satish Dhawan Space Centre Second Launch Pad, Sriharikota, Andhra Pradesh aṭangin  Geosynchronous Satellite Launch Vehicle Mark III (GSLV Mk III) hmangin a kapchhuak a, tluang takin an kapchhuak. 

Ruahman angin thil a kal zel a, kalkawng hautak tak ni mah se an beisei ang leh ruahmanna an siam lawk ang ngeiin a tluang hle a; ISRO pawh an lawm hle a ni. August 14 khan khawvel orbit chhuahsan felin, Thla lam a pan zel a, uluk takin a dinhmun pawh an enfiah reng thu ISRO chuan an puang uar hle.

Ruahman lawkna an siam angin August 20 khan Thla orbit a thleng a, hemi ṭum hian K Sivan hian hmabak a ko thu a sawi a nih kha, a sawi sual lo e. September 2 khan Chandrayaan-2-in a phurh lander Vikram leh rover Pragyaan-te chuan an orbiter chhuahsanin Thla lam pan hian an kal zel a, ni rei lote chhungin Thla hi a thlen thuai beisei a ni a, September 7-ah chuan Thla leilung an rah hman ngei beiseina a sang hle.

A tawpah lungngaihna 

September 7 zingkar hma tak a ni a, prime minister Narendra Modi leh zirlai thlanbikte chuan Chandrayaan-2 lander-in Thla leilung a rap lai hmuh tumin nghakhlel takin an thlir. Mahse km 2.1 chiah a awm tawh tihah lander Vikram and rover Pragyan-te chu an be pawp thei ta tlat lo a ni.

ISRO chief chuan beidawng takin PM Modi hnenah chanchin a hrilh a, PM chuan lo kuahin a lo hnem nghal a, scientist-te pawh hnem nghalin, huaisen taka awmin 'mission' danga rim taka thawk turin a fuih zui ta a ni. A twitter-ah pawh Modi chuan India scientist-te chu a chhuan thu a sawi hial.

ISRO tan chuan lander Vikram awmna chin an hria hi a lawmawm hle. Thuchhuah siam nghalin ni 14 chhung biakpawh tumin hma an la dawn tih nimin khan an tarlang nghal.

ISRO Director hlui D Sasikumar chuan 'crash landing' ni loin 'soft landing'-in Thla leilung hi a thleng a nih a rin thu a sawi a, beiseina a la nei sang hle. Mi thiamte chuan a 'crash landing' a nih a, a part a chhe nual a nih chuan orbiter-in a thla a lak pawh hi a ṭangkai zui dawn lo a, biakpawh zui theih pawh a ni lo thei tih an sawi ve thung.

ISRO chuan Chandrayaan-2 mission 94-95% chu zawh a nih tho thu an sawi zui ve bawk a ni.