Cabinet minister-ten hmun hrang hrangah press conference nei dawn

Prime minister Narendra Modi kaihhruai NDA 2 sorkarin ni 100 a tlinna report pein, vawiin leh naktuk hian ramchhung hmun hrang hrangah cabinet minister 17-ten press conference an nei dawn.

Press conference neih turah hian Modi sorkar-in ni 100 chhunga an hmalak tawhnate report tarlan a ni dawn a, Jammu and Kashmir special status hlih sak a nih thute, US aṭanga Apache helicopter lei a nih thute, loneitute leh sumdawngte tana an hmalak tawhnate report pek a ni ang.

Heng bakah hian, abik takin tunhnai lawka Parliament-in a pass tak 'triple talaq law' chu uar zawka mipuite hnena hrilhhriat a ni dawn. Unlawful Activities (Prevention) Act (UAPA) pawh Parliament-a pass tawh niin, he dan hian sorkar laipui chu firfiaka mi puang tur leh a thil neihte chhuhsak theihna turin thuneihna a pe a ni. UAPA Act, 1967 an tihdanglam laite chu mipuite hnenah hrilhhriat tum a ni bawk.

Tui lama kan hnianghnar zawk nan leh, renchem zawka kan hman theih nan kumin May thlaa dinthar 'Jal Shakti Ministry' chungchangte, Fit India Movement, National Medical Commission leh bank thawhhohna duante chu ni 100 report turah hian tarlan a ni ang.

BJP working president JP Nadda chuan July thla khan NDA sorkar ni 50 report chu a lo tarlang tawh bawk a, he report-ah hian mipui chuan kan khawsak kawngah hma kan sawn thu tarlan a ni.