Farm law chungchangah President-in sorkar thlavang a hauh

Parliament budget session chu nimin khan ṭan a ni a, session ṭannia President Ram Nath Kovind-a'n Parliament in hnih, Rajya Sabha leh Lok Sabha joint sitting-a thu a sawiah  farm law thar pathum chungchangah sorkar laipui thlavang hauhin, he dan thar hi ram chhunga loneitu tenau zawk mi vaibelchhe 10-ten an chhawr ṭangkai a ni, a ti. 

President Kovind chuan Republic Day nia Delhi khawpui chhunga loneituten tractor rally an neihnaah buaina chhuak leh hnam puanzar zah lohna lantirna awm chu thil vanduaihthlak tak a ni, tiin a sawi. "Ram danpuiin kan ngaihdan leh duhdante lantir tura dikna chanvo mi pek rual hian, dan leh thupekte ngai pawimawh turin min hrilh tel a ni" tiin a sawi.

Loneituten dodalna an lantir  mek, farm law pathumte chu hun rei tak sawiho leh buaipui a nih hnuah thla sarih liamtaah khan Parliament-ah pass a nih thu President chuan a sawi a, Swaminathan Commission rawtna angin sorkar laipui chuan mininum support price (MSP) pawh a man pangngai aṭanga  a let khat leh a chanvea tama pek a remti niin a sawi bawk. 

"Kum ruk liam ta chhung khan sorkar laipui chuan agri­culture sector lamah kalphung ṭha zawk siam tumin  theihtawp a chhuah a ni," a ti. Farm law thar pathumte pawh loneituten a ṭha zawk dawn tih hriain political party eng emaw zat pawhin an thlawp tih a sawi. Mahse loneitute nawrh huaihawt avanga Supreme Court-in heng dan tharte hi hman rih loh tura a dansak tih sawiin, sorkar chuan Court thupek hi a zahin a zawm dawn tih a sawi. 

January 16 aṭanga ram puma Covid-19 vaccine pek programme kalpui ṭan chungchang pawh sawichhuakin, President chuan khawvela vaccination prog­ramme lian ber kalpui mek a ni a chhuanawm hle tih a sawi bawk. 

Kum ruk chhungin sorkar chuan health sector lamah hmasawnna nasa tak a thlen thu a sawi a, mi retheite tan damdawi man tlawm zawka lei theihna turin,  Pradhan Mantri Bhartiya Janaushadhi Pariyojana hnuaiah ram pumah centre 7,000 siam a ni tawh a ni, a ti. 

Hetih lai hian Congress party kaihhruaiin eptu party 19-te chuan nawrh huaihawt mek, loneitute an thlawpna lantir nan nimina President thusawi hi an boycott a ni.