Vawiin aṭangin Hazare-a'n chawnghei nawrh huaihawt dawn

Social activist leh anti-corruption crusader, Anna hazare chuan vawiin aṭangin an khua, Maharashtra-a Ahmednagar district-a Ralegan Siddhi-ah loneitute thil phut hrang hrang a thlawpna lantirin, chin awm loin chawngheia nawrh a huaihawt ṭan dawn. 

Kum 84 mi, activist Hazare chuan thuchhuah siamin, "Kum li kalta chhung khan loneitute tan hian nawrh pawh ka lo huaihawt fo tawh a, mahse sorkar chuan loneitute hamṭhatna tur hian thutlukna ṭha tak a la siam lo a, an harsatna hi a ngaihven pui tak tak lo a ni," a ti. Sorkar laipui chuan loneitute tana a thil ngensakte chu a ngaihthah sak zel niin a sawi. 

Hazare chuan thla thum kal ta chhung khan Prime Miniter leh Union Agriculture Minister hnenah pawh ṭum nga lehkha a thawn tawh a, sorkar aiawhte chuan hemi chungchang pawh hi sawiho a, mahse tun thlengin a chinfelna tur thutlukna mumal an la siam thei lo a ni, a ti.

Kum 2018-a Delhi-a chawngheia nawrh a huaihawt khan PMO chuan MSP leh thil dang a phut chungchang tihhlawhtlin ngaihtuah sak turin ziakin a intiam a, mahse tun thlengin sorkar chuan hma a la zui lo a ni, tiin Hazare chuan a sawi. Sorkar laipui chuan thu tiam mah se, a thutiam a hlen loh chuan India ram tan hmabak eng tak a awm thei lo a ni, tiin tun thlengin loneitu tam tak chu harsatna nasa tak an tawh ṭhin avangin an la intihlum reng niin a sawi.  

Loneitute tana chawnghei nawrh huaihawt hi an khuaah a nei dawn a, hemi rual hian amah thlawptute chu an khua ṭheuhah boruak ṭha tak hnuaia nawrh huaihawt hi lo zawm ve turin Hazare chuan a sawm nghal bawk a ni.