PM Modi-an Gujarat inve-stor summit hawng dawn

Prime Minister Narendra Modi chu nimin khan nithum cham turin Gujarat-ah a zin a, vawiin hian Vibrant Gujarat Global Summit vawi kua-na a hawng dawn. A cham chhung hian Gandhinagar, Ahmedabad leh Hazira-te a tlawh ang. 

Summit hi January 18-20 chhung Gandhinagar-ah neih a ni dawn a ni. 

PM Modi hian nimin khan Gujarat a thlen hnuah investor summit peng pawimawh tak pakhat, 'Vibrant Gujarat Global Trade Show' chu a hawng nghal a, tlaiah Ahmedabad-a hospital sak thar,  Sardar Vallabhbhai Patel Institute of Medical Sciences and Research a hawng bawk. Khum 1,500 awmna super-speciality public hospital hi BJP rorelna, Ahmedabad Municipal Corporaton (AMC) sak niin, VS Hospital compound-ah sak a ni. Nimin tlai vek khan PM hian Sabarmati Riverfront-a shopping festival a hawng nghal bawk a ni. 

Modi hian vawiinah ni thum awh tur summit hi a hawng dawn a, tlai lamah state hruaitute nen an inkawm ang. Summit-ah hian ramdang sorkar hotu panga bakah, national leh internatioal palai 30,000 chuang zet an tel rin a ni a, India leh rampawn lama company lian CEO eng emaw zat an tel beisei a ni. 

India rama sumdawng lian  Mukesh Ambani, Uday Kotak, Kumar Mangalam Birla, Gautam Adani, Adi Godrej leh Pankaj Patel-te pawh an tel dawn a, anni bakah hian global company BASF, DP World, Suzuki, Vanguard leh Maersk top executive-te pawh an tel ang. 

PM hian naktukah Surat bula Hazira industrial area leh Silvassa a tlawh dawn a, project hrang hrang lungphum a phum dawn a ni.