Jamia Milia Islamia University hawng leh tawh

New Delhi-a Jamia Milia Islamia (JMI) University chu nimin aṭang khan hawn ṭan leh a ni tih university thuneitute chuan website-ah an tarlang.

Nikum December 13-a Citizenship Amendment Act (CAA) 2019 duh lohna lantirnaa buaina a chhuah hnu, December 16 khan University hi khar a ni a, Pathianni thleng khan khar niin, nimin khan an hawng leh ta a ni. Post-graduate course tam zawk semester exam chu January 9 hian ṭan tura ruahhman a ni a, undergraduate course hi January 16 aṭang exam ṭan tura ruahhman a ni bawk. JMI zirlaite chu exam hmachhawn tura University-a kal vek turin University thuneitute chuan an hriattir.

JMI zirlaite chuan thuthang dik lo tam tak kara thu dik an hriat theih nan, an University website tlawh zing turin thuneitute chuan an ngen. An zirlaite'n thu zawhfiah duh an neih chuan "Jamia Help Desk number 011-26981717-ah emaw 7647989611-ah" zing dar 10 aṭanga tlai dar 5 thleng thu zawhfiah theih a nih thu an tarlang bawk.