UN rights chief-in Kashmir khuahkhirhna hlip turin ngen

Office of the United Nations High Commissioner for Human Rights chief Michelle Bachelet chuan UN Human Rights Council Meeting Geneva-a neihah New Delhi chu Jammu and Kashmir-a khuahkhirhna an kalpui mek hlip turin a ngen.

UN Human Rights Council Meeting-a thu a sawinaah Michelle Bache­let chuan Kashmir chung­changah a office chuan human rights kaihhnawih report an dawng reng tih a sawi a, Line of Control (LoC) lehlam lehlama thil awm dan report kan dawng reng a ni, a ti. Hemi chungchangah hian Kashmir mite laka India sorkarin hrekna a siam, internet communication leh pumkhawm a khapte bakah politics hruaitute leh activist a hrente chu a ngai thutak hle tih a sawi.

Kashmir mipuite dikna chanvo zahsak turin India leh Pakistan chu a ngen tih sawiin, a bik takin India chu a khuahkhirhna siamte hlip turin ka ngen a ni, a ti.

India hian Kashmir hmun tam takah hian khuahkhirhna a la siam chhunzawm a, August 5-a Article 370 a paih hnu khan hmun eng emaw zatah chuan internet hi a la titawp a ni. Hmun eng emaw zatah curfew la puan chhunzawmin, telephone line-te pawh hman theih lohin a la siam a ni. 

Assam-a National Register of Citizens (NRC) list tihchhuah chungchang pawh sawiin, UN hotu chuan list-a tel lote chu state nei loa an awm lohna turin humhimna pe turin India chu a ngen bawk.

India hmarchhak state Assam-a National Register of Citizens verification kalpui chuan mang­anna nasa tak a thlen a, mi mak­taduai 1.9 aia tam list-ah an tel lo a ni, tia sawiin Narendra Modi sorkar chu list-a tel lote humhimna pe ngei turin a chah.