AP CM-in Kristian pastor-te thla tin hlawh pe dawn

Andhra Pradesh chief minister Jagan Mohan Reddy chuan a kaihhruai sorkarin an state-a Kris­tian pastor-te kut hah man thla tin Rs.5000 a pek dawn thu a sawi.

Thlatina Kristian pastor-te kut hah man pek a nih tur thu hi, an state inthlan dawn laia Jagan Mohan Reddy kaihhruai Yuvajana Sramika Rythu Congress Party (YSRCP) manifesto zinga mi a ni. Manifesto-ah hian temple enkawlna tur atan cheng Rs.10,000-35,000 thleng a pek tur thu tarlan a ni a, muslim imam leh muezzin-te kut hah manah cheng Rs.15,000 pek a nih tur thu tarlan tel a ni bawk. Heng an thutiam zawng zawngte hi nakkum March-ah tihpuitlin fel hman an tum.

Andhra Pradesh Minorities Welfare Department chuan Kristian minorities tana hamṭhat vena tur an buatsaih hi, state chhunga Collector leh District Magistrate-te hnenah hriattirna pechhuak nghalin, khawtina pastor awm zat leh chanchin kimchang ni 15 chhunga sorkara thehlut hman turin a hriattir.

BJP-te chuan Reddy kaihhruai hmalakna hi na taka sawisel nghalin, mipui pawisa tur pastor-te hnenah pek a ni tur hi a dik lo a, state sorkarin Kristian sakhuaa inlehna tura a puihna a nih thu sawiin, dan ṭha lo tak YSR Congress Party chuan an siam a ni, an ti.

Reddy kaihhruai hmalakna hi BJP hian an vawikhat sawiselna a ni mai lo a, thla hmasaa Tirupati khuaa bus ticket-a Jerusalem yatra leh Haj pilgrimage advertisment tihchhuah chungchangah pawh khan Hindu sakhua zah loah puhin, BJP hian na takin Reddy kaihhruai sorkar hi an lo bei tawh bawk a ni. 

Andra Pradesh CM Reddy hi Kristian a ni a, inthlan lai pawh khan a vote zawn nan chauh Hin­du-te temple chu a tlawh ṭhin a, auditorium-a light chhit a phal lo a, hindu-te a zahpah lo a ni, tiin BJP chuan amah hi an sawisel nasa hle.