PM-in single-use plastic hmang tawh lo turin khawvel a ngen

Prime minister Narendra Mo­di chuan nimin khan Greater Noi­da, Uttar Pradesh-a United Na­tions Convention to Combat Deser­tification (UNCCD)-in 14th Con­ference of Parties (COP14) a neihah thu sawiin, khawvel pumah single-use plastic hman khap turin a ngen. 

India chuan single use plastic hman a khap dawn tih sawiin, ram dangte pawhin hei hi an tih ve a hun tawh nia a ngaih thu a sawi. PM Modi chuan India sorkarin a ramngawte humhalh tura a beih dante sawiin, he huna ram hrang hrang hruaitu kalkhawmte hnenah kum 2015 leh 2017 inkarah India rama ramngaw awm zat chu hectare maktaduai 0.8-a a pun thu a hrilh. 

Modi chuan a kaihhruai sorkarin faina beihpui thlakna tura Swachh Bharat mission a kalpui dan te, tui humhalhna tura a hmalak dan  hrang hrang te, loneitute sum lakluh a leta tihpun a nih theihna tur program siam a nih chungchangte a sawilang bawk. 

Sorkar laipui chuan Mahatma Gandhi piancham, October 2 hian rampumah plastic item paruk hman khap a tum a, item a khap turte hi - plastic bag, cup, plate, small bottle, straw leh sachet-te an ni. Heng item paruk khap hian India-in kum khata plastic a hman zat chu 5%, ton maktaduai 14 vel zetin a tihtlem phah rin a ni.