Hnam puanzar zahlohna khan India a ti na a ni : PM Modi

Prime minister Narendra Modi chuan thla tina radio programme a hman ṭhin, Maan Ki Baat chu nimin khan hmang lehin, hei hi kumin atana a hman hmasak ber a ni. 

PM Modi chuan ni­mina thu a sawiah, Republic Day nia Delhi khawpuia loneituten tractor rally an huaihawt ṭuma buaina chhuak chungchang a sawilang. Red Fort-a loneitu ṭhenkhatin India hnam puanzar zarna hnuai Sikh sakhaw hnam puanzar an zar chungchang sawilangin, India hnam puanzar zahlohna lantirna khan India a tina hle a ni, a ti. 

Loneitu nawrh huai­hawt zinga ṭhenkhatin Red Fort-a buaina an siam chungchangah chhui chiang tura eptuten ngenna an siam pawh PM chuan a ṭul angin dan anga hma lak a nih tur thu a lo sawi tawh bawk. 

-Made in India vaccine chu India intodelhna lantirtu pawimawh tak a ni a, hei hi India tan pawh inchhuanna tham a ni. 

- India rama vaccination programme kalpui mek chu khawvel huap pawha entawntlak a ni a, ram dang zawng aiin vaccine pek chhuah hna hi kan thawk chak a ni. 

- Ni 15 chhungin mi nuai 30 hnenah vaccine kan pe thei a, America chuan hemi zat pe tur hian ni 18 hun a hmang a, Britain chuan ni 36 a hmang. 

- Kumina India zalenna champha vawi 75-na kan hmang dawn a, hei hi zallenna neni  theihna atana lo beitute kaihhnawih hmun hrang hrang zawnchhuahna hun ṭha tak a ni. 

- India@75 atan ṭhangthar ziakmite pualin hma lak a ni a, hei hian state tina ziakmi naupang zawkte a cho phur ngei kan beisei a, hemi chungchang hi education minister website-ah zirchian theih a ni.  

- January 17 - February 17 hi 'Road Safety Month' atan kanhmang a, road accident a tlem theihna atan leh, nunna chhanhim a nih theihna atan mi tinte theihtawp kan chhuah a ngai a ni.