Delhi-a Israel embassy bulah bomb puak

Delhi-a Israel embassy bulah kar liam ta Zirtawpni zan khan bomb na vak lo a puak. Thil tihchhiat lian tham a awm lo a, a bula car ṭhenkhat a chhia a, hliam an awm lo bawk. 

Official-te chuan "very low-intensity" IED (improvised explosive device) hi tlai lam dar 5.05 khan a puak nia sawiin, he hmun hi President Ram Nath Kovind, prime minister Narendra Modi leh sorkar official ṭhenkhatten Beating Retreat ceremony an hmanna, Vijay Chowk aṭang km 1.4 vel chauha hla a ni. 

Bomb puahna hmun hi National Security Guard chuan an enfiah nghal a, Dehli police leh investigative agency dangten an chhui zui mek bawk. Israel lam chuan he pawikhawihna thlengah hian Iran IRGC (Islamic Revolutionary Guard Corps) an inhnamhnawih an ring. Hei vang hian Delhi police-te chuan Foreigners Regional Registration Office (FRRO) hnenah tun hnaia Delhi tlawhtu, Iran mi list an dil a ni. Israel prime minister Benjamin Netanyahu chuan pawikhawihna thleng chungchang chhuinaah India chu a ring tawk tih a sawi. National security advisor Ajit Doval chuan an hna thawh chin chu Israel security hotu hnenah a hrilh ve nghal zel bawk. 

Bomb tihpuahna hi Jindal House bul a ni a, mahse helai hmunah hian CCTV camera dah a ni lo a, a bang pawh a sang hle a ni. Thingkung bula CCTV camera dah pakhat chu a khawl lam a chian loh avangin en theih a ni lo bawk.