Loneitute thlawpna lantirna atan Punjab CM-in all-party meeting a ko

Punjab chief miniter Amarinder Singh chuan farm law thar duh lohna lantira nawrh huaihawt mek, loneitute an thlawpna lantirna atan naktuk-ah all-party meeting a ko. 

Meeting hi chawhma dar 11-ah Punjab Bhawan-ah neih a ni dawn tih sorkar thuchhuah chuan a tarlang. CM Singh chuan farm law duh lohna lantira Delhi-a nawrh huaihawt mek zinga Punjab loneitu tel tam tak chu police-ten kutte an thlak niin a sawi. Hei vang hian loneitute an thlawpna lantir hi a ṭul tih sawiin, "Tun hi kan state leh kan mite chhanhim tura kan ṭanrual hun a ni," a ti. 

Meeting-ah hian Delhi-a loneitu nawrh huaihawt mekte chunga sorkar chet dan te, Republic Day nia Delhi khawpui chhunga buaina chhuak te, Singhu border-a loneituten beih an tawh dante an sawiho dawn. CM chuan state chhunga party hrang hrangte chu he meeting-ah hian tel ngei turin a ngen. 

Delhi border-a nawrh huaihawt mek, loneitu zinga a tam ber hi Punjab leh Haryana aṭanga kal an ni. "Kan mi leh sa, loneitute chu Delhi border-ah hrehawm takin thla hnih chuang an awm tawh. Police leh misualte kut an tuar fo a, an mamawh pawh duh ang nei thei loin an awm a ni," tiin CM chuan a sawi. Punjab-a political party hrang hrangte chuan inkar boruak ṭha lo leh inhriatthiam lohna an neihte dah boin, loneitute harsatna tawh mek chinfel sak dan ngaihtuaha hma an lak ho a ṭul tih a sawi.