Hospital aṭangin AIADMK hruaitu hlui Sasikala chhuak

AIADMK hruaitu hlui, party aṭanga hnawhchhuak tak leh Tamil Nadu chief minister J Jayalalithaa-i thawhpui hnai tak, VK Sasikala chu Covid-19 a kai vanga damdawi-ina enkawl a nih hnuah nimin khan chhuah tir a ni ta. 

VK Sasikala hi kum 2017 khan eiruk thubuaiah thiam loh chantirin kum li tang tura hrem a ni a, Bengaluru jail-ah tantir a ni a, a tan hun hi a zo tawh a ni. A tan hun tur a zo hma lawk hian khawsik leh thawk lama harsatna a neih avangin damdawi-inah dah a ni a, Covid-19 a kai tih hmuhchhuah zui a ni. Damdawi-a enkawl a nih lai hian jail a tan huna  zawh thu leh, chhuah a ni thu official-in puan zui a ni bawk. 

Bangalore Medical College bulletin chuan kum 66 mi, Sasikala-i hi ni 10 chhung enkawl a nih hnuah, a taksaah harsatna a nei tawh lo a, ni thum chhung oxygen hman ngai loa a awm tak avangin kaihhruaina an neih angin hospital aṭanga chhuahtir theih a ni ta tih Inrinni khan a tarlang a,  nimin khan chhuah a ni ta a ni.