UN Chief Antonio Guterres-a'n Kashmir chungchang inbiakna hmanga chingfel turin ngen
United Nations Secretary-General Antonio Guterres chuan nimin khan Kashmir chungchang sawiin, India leh Pakistan chuan Kashmir chungchang chu an chingfel thei tih a sawi.
Antonio Guterres chuan chuan ram pahnih chu inbiakna hmanga an buaina chingfel turin a ngen tih a thupuangtu Stephane Dujarric chuan a sawi a ni. Prime minister Narendra Modi leh Pakistan PM Imran Khan-te an tel ngeina tur UN General Assembly session, tunthla chawhnu lama neih turah Kashmir chungchang hi sawichhuah tum a ni em tia zawhna awm a chhannaah, Dujarric hian Antonio Guterres thusawi hi a sawichhuak.
Kashmir chungchangah hian UN chuan Simla Agreement 1972, India leh Pakistan-in Kashmir chungchanga inremna an lo siam tawh chu an dinna a nih thu an lo sawi tawh a ni. Dujarric chuan High Commissioner for Human Rights thusawi pawh sawichhuak lehin Kashmir buaina chu human rights zahna nen chauh chinfel theih a nih thu a sawi lang leh bawk.
UN Chief Antonio Guterres hian thla hmasaa Biarritz, France-a neih G7 summit-ah khan PM Narendra Modi a hmu a, Pakistan foreign minister Shah Mahmood Qureshi nen pawh inbiakna an nei tawh. Thawhṭanni khan Permanent Representative of Pakistan to the UN Maleeha Lodhi pawh a hmu a ni.