Chidambaram-a'n Delhi HC-ah bail dil

Union minister hlui, P Chidambaram chuan INX Media case-ah nimin khan Delhi High Court-ah bail a dil. Hei bakah hian trial court-in September 4-a ni 15 chhung judicial custody-ah dahna tur thupek a siam chu a khing let bawk. 

Kum 73 mi, Congress hruaitu Chidambaram hi INX Media case-ah hian August 21 khan Central Bureau of Investigation (CBI) chuan a man a ni. 

Trial court chuan Chidambaram an puhna hi a serious viau tih sawiin, hei vang hian police kuta awm turin a lo ti tawh a ni. CBI hian bail a dilna pawh hnawlsak tura a ngen thu leh, chhuah a nih chuan an thil chhui thlengin a bahlah phah theih thu an sawi niin a tarlang. 

Chidambaram hi Tihar Jail-ah dah mek a ni a, cell hran pek a ni. September 19 thleng hren a la ni ang. Nimina Delhi High Court-a bail dilna a thehluhah, Chidambaram chuan man a nih dan chu dan kalh niin a sawi. INX Media case-a inhnamhnawiha puh dangte pawh man a nih loh thu a sawilang bawk. Hei bakah hian CBI pawhin an duh angin thu an zawtfaih tawh a, hei vang hian hren zel a nihna chhan tur a awm lo, a ti. 

Chidambaram chuan a laka thubuai an siamte chu kum 2007-a thil thleng behchhan a nih thu leh, he thubuaia inhnamhnawiha an puhnate chu thu dik lo, belhchian dawl lo a nih thu a sawi bawk.