BJP-in a thuneihna dik lo takin a hmang : Sonia Gandhi

Congress Party interim president Sonia Gandhi chuan ram economy dinhmun ṭha lo chungchang chu a vei hle tih sawiin, central-a BJP kaihhruai sorkar chuan a thuneihna chu dik lo takin, hlauhawm takin a hmang mek a ni, a ti. 

Nimina New Delhi-a party headquarters-a Congress hruaitu­te nena meeting an neihah, Gandhi chuan prime minister Narendra Modi kaihhruai sorkar hnuaia India democracy dinhmun chu a chhe zel tih sawiin, an party chuan mipuite hmaah BJP nihna dik tak phochhuak tura an kalpui a hun tih a sawi. 

Meeting-ah hian PM hlui Manmohan Singh, AICC general secretary-te leh state hrang hrang incharge, state chief minister leh Congress Legislative Party hruaitute an tel a ni. Party president hlui Rahul Gandhi erawh a tel lo. 

Sonia Gandhi chuan ram economy dinhmun a hniam zel a, hloh zat a pung zel a, mipuite rinnna pawh tihderthawnsak a ni tawh tih a sawi. BJP sorkar chu economy dinhmun chhe zel avanga mipuite rilru lak pen tumin, politics phuba lakna lam ringawt buaipuiah a puh.