India rama muslim-te tan hlauh tur a awm lo: RSS
Rashtriya Swayamsevak Sangh (RSS) joint general secretary Krishna Gopal chuan Parsi, Buddhist leh Jain-te thlamuang taka an awm ang bawkin, India rama muslim vaibelchhe 16 awm mekte tan hlauh tur engmah a awm loh thu a sawi.
New Delhi-a Academics for Nation-te'n programmme an buatsaihah Krishna Gopal chuan thu sawiin, "Minorities dangte pawh thlamuang tak leh him taka an awm theih laia, muslim an him loh bikna chhan tur a awm lo. Hei hi zawhna lian tham tak a ni, muslim-te rilrua hlauhthawnna lo awm hi," a ti.
"Kan ramah hian Parsi 50,000 bawr vel an awm a, Jain nuai 45 leh Buddhist nuai 80 vel khawsa mekin, tumah an hlau lem lo. Kan rama kum 600 chuang ro lo rel tawh muslim-te hian hlauh an nei erawh hi chu, zawhna lian tak a ni," tiin Gopal chuan a sawi.
Kalkawmte hmaah Gopal hian India chuan Vasudhaiva Kutumbakam (entire world is one family) leh Sarve bhavantu sukhinah (everyone should be happy) thurin hi a dodal ngai lo a, Pakistan pawhin he thurin he pawm se a duh thu a sawi a ni.