University ṭha 300 zingah Indian University-te lang lo

Times Higher Education (THE) World Uni­versity Rankings 2020 tihchhuah tharah, top 300 list-ah Indian University-te kum sarih chhung an lan hnuah an lang pha lo.

Indian Institute of Science (IISc) Ban­galore leh Indian Insti­tute of Technology (IIT) Ropar-te chu rank 301-350 inkarah an awm. Anni bakah hian IIT Mumbai, Delhi leh Kharagpur-te chu rank 401-500 inkarah an awm bawk.

India ram aṭanga institution ṭha langsang ber ṭhin IISc hi nikum khan rank 251-300 inkarah a awm a, rank thar berah erawh 300 chinah a lang pha ta lo. 

World University Ranking-ah hian University of Oxford, United Kingdom chu pakhatna a ni. Ram 92 aṭangin University 1,400-te an tel bawk.