UP sorkarin khawlai bawng enkawltu hnenah sum pe dawn

Uttar Pradesh chief minister Yogi Adityanath kaihhruai BJP sorkar chuan khawlai bawng, stray cow awmte enkawl (adopt) tura latu hnenah ṭanpuina sum a pe ṭhin dawn. Hei hi stray cow pung zel venna tur atana a tih a ni. 

State sorkarin khawlai bawngte enkawl tura latu hnenah a enkawlna man ni khatah Rs 30 zel a pe dawn tih a sawi. Semi-urban leh rural area-a chengte chuan bawng, sial leh bawng note enkawl tur hi pali thleng an lak phalsak a ni ang. 

Stray cow adopt theihna tur scheme 'Nirashrit/Besahara Govansh Sahbhagita Yojana' hi August 8 khan siam a ni a, mahse September 9 aṭangin kalpui ṭan a ni thung. Veterinary officer Tej Singh Yadav chuan scheme kalpui a nih aṭangin stray cow enkawl duha dilna thehlut hi 1,500 chuang an dawng tawh tih a sawi a, dilna thehluttu tam ber hi loneitute leh nitina inhlawhfa ṭhinte an ni tih a sawi. Bawng an enkawl chuan an nitin sum lakluh a lo pun phah bakah, khawlai bawng pung zel tur pawh ven a ni thei dawn tih a sawi a ni. 

Lucknow-ah hian neitu nei lo, stray cow 24,940 zet man an ni tawh a, hengte hi enkawl tura lak theih an ni dawn a ni. Veterinary department chuan stray cow latute chu an enkawl dan pawh enfiah chhunzawm zel a ni dawn tih an sawi.