Feb 8-ah Delhi inthlang dawn

India ram khawpui Delhi Assembly inthlan chu February 8-ah neih a ni dawn tih nimin khan puan a ni a, February 11-ah result puan a ni ang.  

Polling station 13,750 dah tum a ni a, station hrang hrang vil tur hian official 90,000 ruat a nih tur thu Chief Election Commissioner Sunil Arora chuan a sawi.

Inthlan chungchanga hriattur hi January 14-ah chhuah a ni anga, hemi ni aṭang hian 'Model Code of Conduct' hman ṭan nghal tur a ni. Nomination thehluh theih hun chhung hi January 22 thleng a ni dawn a, January 24 thleng a inhnuhdawh leh theih bawk ang.

Tuna sorkar mek Aam Aadmi Party (AAP) leh assembly member-te term hi February 22-ah a tawp dawn a ni. Delhi Assembly-ah hian member 70 an awm 

mek bawk. Inthlan hnu hnung ber, kum 2015 khan AAP chuan seat 70 awmah seat 67 lain sorkarna an siam a, BJP-in seat 3 an la ve bawk a ni.